1. Zalênna sualtu, Mizo hnam Pasalṭha 1966 atanga Mizoram State puitling kan nih thlenga, ram tana nunna hlantu leh penchhuak zawng zawngte zahna chibai kan buk che u a. Kan thinlungah hian hmun pawimawh tak in la chang reng a ni.

2. Dodâlna tamtak karah, vawiin ang hi kan hruaitu hmasate hmalaknain MZP chuan urhsûn takin a lo hmang tawh thin a. 1966 March ni 5 khan India sawrkarin a la tih ngai loh a ram chhunga a chhal Mizoram chu Jet Fighter hmangin a bei/ nghaisa a, hei hi ṭhangthar ten kan la theihnghilh lova. Kha kan tawrhna aṭangin Zofaten inpumkhatna ṭha kan neih a, hnam anga kan dinchhuah a, ṭanrualna ṭha kan neih theih nan he ni hi hmang kan ni. India laka phuba lak a, hel thar leh hi kan tum a ni lo.  

3. 1945 khan USA in Herosima (Japan) a bomb a, he ni hi kumtin a cham August ni 6 hi World Peace Day tiin Japan chuan an hmang ziah a. Japan hnam a dinchhuaha, Economy hmanga khawvel an awp theih nan inzirtir na hunah an hmang thin. 

4. Kum 1947 February 28 khan Chiang kai shek (Chinese) leh a pawlte chuan Tiwan ram mi 25000 zet ni khat thilthuah an that a, he ni hi kumtin urhsun takin "National Unity Day" tiin an hmang thin. 

5. 9/11 pawh kan hria, 2001 September ni 11 khan Al-Qaeda ten World Trade Center an bei a nih kha. He ni hi a thlen apiang hian, urhsun takin hman ṭhin a ni. Chutiang bawkin he Zoram Ni pawh hi hman a ni.  

6. Ram siamṭhat nana Political Party hrang hrangten, sawrkar lai khalh ngil nana an hmalakna hi ṭha kan tiin kan thlawp a. Tun hnaiah Political Party pakhatin President Rule chungchang sawiin, Memorandun te an thehlut a. Hei hi MZP chuan ṭha kan ti lo a, kan thawp lo a ni. Kan ram tan thil ṭha niin kan hre lo, he thil hi chu sawiri tawh lo turin Political Party te kan ngen a ni.

7. Tun hnaiah Aizawl khawpui chhunga zirtirtu pakhatin, Class X exam mek panga (5) te admit card a hren sak ngawt mai a. MZP chuan hei hi hma kan la nghal a, zirlaiten an dikna chanvo an chan theih nan hma kan la a ni. Zirlaiten kan dikna chanvo kan chan theih nana kawng daltu chu, tu pawh ni sela MZP chuan a dodal zel dawn a, zirlai rahbeh a awm apiangte tan MZP a inhawng reng e. In tan MZP a ding tlat dawn a ni. 

8. Mizote kan tuihalna All India Service leh Central Service-ah kan tling hlei thei lova. Hei hi MZP chuan a vei em em a, Delhi a Coaching Center changtlung tak Vajiram & Ravi te nen kan indawr mek a. An ni hian MZP te seat 5 min reserve sak a ni. MZP chuan mizo zirlai thiam thei, tumruhna nei mi 3 sponsor kan tum a. MPSC te nen tangkawpin Screening/ Entrance buatsaih a ni dawn a. Zirlai thiam thei, hetiang lama tui, tumruhna neite lo exam ngei turin kan sawm che u a ni. 

(Pu Lalnunmawia Pautu, President MZP General Headquarters thusawi. @HYVE Aizawl City Hall. 5/3/2022)