1. MZP-in kum 2008 aṭanga chawl lova Zoram Ni an hmang chu lawmawm ka ti hle a ni.

2. March ni 5, 1966 khan Zoram khawvela kan hun tawn lungchhiat thlak ber mai kan tawng a. Aizawl leh Mizoram hmun hrang hrang Indo thlawhtheihna hmanga bomb a ni.

3. Zoramin zalenna famkim a neih theihna atana British hunlai aṭanga beitu, martar leh pasalṭhate Zoram Ni-ah hian zahna chibai ka buk a, Zofate thinlungah in nung reng dawn a ni.

4. British-in tihluihna hmangin Zofate min awpbet a, 1947-ah tihluihna hmangin Indiaah min hnutchhiah ringawt a. Hemi avanga hian zangna dawmna min pein thupha an chawi dawn lo'm ni? India hian Mizoram an bomb avangin thupha an chawi dawn lo'm ni? India-ah hian sorkar do zawnga ralthuam lek chi hrang hrang an lo awm tawh a, Mizote chiah hi indo thlawhna Jet fighter hmanga beih awmchhun kan ni.

5. India kha mahni ram mipui indo thlawhnaa bei awmchhun a ni awm e. Sawi nep theih a ni lo. Thudik chu India-in a hria a, Mizo mipuiten kan hria a ni. khatiang tuarna kha tu hnam mahin tuar tawh lo se kan duh a ni.

6. Kan hnam Pasalṭha, Lalnu Ropuiliani leh Khuangchhera leh he hnam zalenna atan beitu pasalṭhate inpekna i hre reng ang u. An tum ram zalenna mei hi a mit tur a ni lo. Zofa hmun hrang hrang - Bangladesh, Burma leh India-a ṭhendarha awmte hi rorelna pakhat hnuaiah zalenna famkim neiin kan la insuihkhawm leh ngei ang.

7. 'Kan sakruang Mizoram tan' ti zel thei turin kan inbuatsaih a ṭul a ni.

8. Zofate thinlungah Nationalism hi thar reng se ka duh a. Kan ram lo hi ram dang kan nei lo a, kan hnam tan theihtawp i chhuah zel ang u.

(Zoram Ni 2022– MZP General Headquarters buatsaiha HYVE Aizawl City Hall a hman naa khuallian, Pu Lalruatkima MoS, GoM thusawi tlangpui lakkhawm a ni.)