Aizawl, 14 Nov 2023: Mizo Zirlai Pawl (MZP) General Headquarters, Aizawl huaihawtin vawiin November 14, 2023 khan Mizoram Scholarship Board Office kawtah Zirlaite Scholarship 2nd Installment pekchhuah har vanga lungawi lohna lantir nan leh Scholarship sum pekchhuah vat phutin punkhawm a ni.

He hunah hian MZP President Pu H Lalthianghlima chuan thu sawiin, "hetiang ti lo thei loin Scholarship buaipuitute hian min siam a ni," a ti a. "Vawiin hi a bul tanna a ni a, vawiina lungawi lohna lantir in awmzia a neih loh chuan a tawp thlengin hma kan la zel dawn” a ti.

MZP President chuan hmalak zel dan turah an inhuam thui thu sawiin, "Total Bandh thlenga hmalak a ngai a nih pawhin kan ti hreh dawn lo tih hi thuneitute'n lo hria se kan duh," a ti.

Vawiin-a hmalaknain awmzia a la neih loh avangin, MZP chuan naktuk November 15, 2023 zing dar 10:00 atang hian MSB office kawtah punkhawm leh a tum a ni.

Scholarship Board-in Election Commission-ah phalna an lak ngai anga an sawi avangin MZP chuan, vawiin chawhnu vek khan Mizoram Joint Chief Electoral Officer (Joint CEO) hmuin zirlaite Scholarship pekchhuah vat a tul thu a sawipui nghal a. Chief Election Commissioner of India hnenah pawh zirlaite scholarship pek chhuah phalna pe vat turin ngenna lehkha a thawn nghal.

Zirlaite scholarship second installment tang zat hi cheng nuai 1,787.48 zet a ni a, heng pawisate hi Mizoram sawrkar kutah ni 25th September, 2023 khan a lut tawh a. MZP chuan zirlaite hnenah pe chhuak vat turin thuneitute a ngen nawn leh a ni.

Scholarship second installment pawisa la dawnglo hi zirlai 19,495 an awm a, Mizoram chhunga zirna in 36 atangin zirlai 5,023 bakah Pawl XI leh XII zirlai 11,462 leh Mizoram pawna awm zirlai mi 3,010 in an la dawng lo a ni.