8 May, 2024

1. MZP chuan Mizorama hna latu sang ber, Mizoram Public Service Commission (MPSC) hnuaia Mizoram Combined Competitive Examination leh Asst. Conservator of Forest (ACF) hna lakah thil diklo awm chungchangah, MPSC Chairman chu mawhlaa bang turin a lo ngen tawh a.

2. MZP ngenna leh hmalaknain awmzia a neih loh avangin, MPSC Office kai tur pawh ni hnih chhung dan a ni a. Mizoram sawrkar hmalaknain Vigilance Department chuan Inquiry Officer ruatin, heng hnu chhuina kalpui a nih chhung chu Police venna hnuaiah MPSC Office a awm a. Chutih laiin, Inquiry Officer ruat hnu ni 16 April, 2024 tlaiah MPSC Office hnathawk thenkhat a rukin Office-ah an lut tih hriat a ni a. A zan a zanin punkhawm leh a ni.

3. MPSC hnuaia, Mizoram Combined Competitive Examination leh ACF hna lak dan chhui tura ruat, Inquiry Officer chu Secretariat-ah office pek niin, ni 7 chhunga a report peih tura beisei a ni a. Inquiry Officer report chu vawiin thlengin MZP hi hriattir a la ni lo hrim hrim a, CM Press Conference atangin MZP chuan a hre ve chauh a. Inquiry report chu RTI hmanga dil mek a ni.

4. MZP chuan, MPSC hna lak dan chhui tura ruat I.O-in, "thil fello a awm lo" tih a findings a ni chu mak a tiin, a pawm thei lo a. MPSC hun rei tak lo enkawl tawhtu a nih avangin, MPSC mualpho loh na turin thutlukna a siam ta mai em ni tih hi MZP zawhna a ni.

5. Dik lo thei loa inngai, MPSC hna lak dan hi MZP chuan hriatthiam har a ti hle a. Hna sang ber laknaah, answer paper leh mark tabulation-ah correcting fluid nasa taka hman a ni chungin tihsual an nei lo chu MZP chuan mak a ti hle a.

6. MPSC chhuitu hian "tihsual an nei lo" a tih avangin, MPSC hian Answer paper leh mark tabulation-ah Correcting fluid duh duha hman an phal tihna a ni a. Mi thenkhat mark siamthatna initial thlap thlap a nih laia, mi thenkhat mark correcting fluid hmanga tih that a ni bik chu MZP chuan thil fair takah a ngai thei lo a. Duhsak zawngte tih tlin theihna kawngka zau tak System- MPSC-in a hmang hi a him lo takzet a ni

7. Hnu chhuituin, correcting fluid a thai chhiat tawh a hmu thei leh, “tihsual a awm lo” a tihah hian: Tihsual awm lo hi eng vangin nge thaichhiat a nih tih hi MZP-in a zawt a. Mark khaikhawmna (tabulation) initial tel miah lo a thaichhiat leh mark pek that nuaih hi a fair dan a zawt bawk a. Hetiang dan leh kalphung fairlo tak hi paih a, bansan nghal turin kan phut a ni.

8. MZP chuan ACF hna lak, exam vek tawh hnua Answer paper endik loh tur tih kha, Inquiry Officer hian a chhui tel lo em ni tih a zawt nghal a. Department Recruitment Rules ang ni loa Exam conduct-tu MPSC hian, mawhphurhna lain, exam tawh hnu answer paper hi endik tlang ngei se a duh a. Thalai hna zawng mekte inbuatsaihna tithlawn lo se a duh a ni.

9. MPSC Chairman chhuakta, Pu JC Ramthanga hian "MPSC Chairman chu bang tura nawr chi a ni lo" tih amah an thlahnaah a sawi a. MPSC-a thil thleng zawng zawngah hian mawh laa bang tur a nih laia, a bang ngam lo chu MZP chuan a hun kal tawh enin awm a ti hle a ni. Addl. Chief Secretary a nih lai November, 2020 khan a makpa chu Covid chhuanlamin one time relaxation hmangin, Mizoram Engineering Service a thun tum tawhtu a ni a. MZP hmalakna avangin an ti tlang ta lo mai kha a ni. Tin, Chief Secretary nih a duh avangin, a mah aia senior zawk Chief Secretary ni theite nasa taka tibuai tawhtu a ni bawk. Zirlaite hmalakna avangin; Minister, MLA leh mi pawimawh tak tak Mizoramah ngei pawh ban an lo ni tawh a. MZP hmalakna avangin, kum 1979 khan Tribal Quota titawp tura Parliament in hnihin a passed tawh pawh India President-in a lo hnawl phah tawh tihte hi Pu JC Ramthanga hian hria se MZP chuan a duh a ni. Mizoram Sawrkar hian hun lo la kal zel turah, eng dinhmun pawimawhah mah ruat nawn tawh lo se MZP chuan a duh bawk.

10. MZP chuan Inquiry Officer pakhatin, thiam chantir mahse MPSC dik lohna chu a dik ta tihnaah a ngai lo a. MPSC dik tak a awm theih nan ngun takin a enzui zel dawn a ni.