Mizo Zirlai Pawl (MZP) General Headquarters, Aizawl chuan vawiin ni 4 May, 2024 chhun dar 12:00 khan Vanapa Hall-ah Higher Secondary School Leaving Certificate (HSSLC) Examination 2024 Top 3-a Mizo tlingte chawimawina hun a buatsaih a, Dr. Vanlalthlana, Education Minister chuan Khuallian niin a hmanpui.

Programme tan hma hian, tunhnaia Cyclone Remal avanga zirlai nunna chante sunna hun hman ani a. Ngawi rengin minute 1 din a ni.


MZP President Pu H. Lalthianghlima chuan thu sawiin, "Kan chhehvel a kan unaute an ram a buai avangin, an him nan Mizoram an rawn bel a. Hmangaih leh lainatna nen kan dawh hram hram a, kan lo la mikhual hram ham an ngai a ni" a ti a. "Zirlaibu a huna sem a ni lo fo chu MZP chuan hriatthiam har a ti a. Mawhphurtu zawn chhuaka hrem nise" a ti bawk.

Khuallian Dr. Vanlalthlana chuan thu sawiin, HSSLC Top-3 a tling Mizo zirlaite chu lawmpuina leh duhsakna a hlan a. Chutih rualin an bul tanna a nih avangin, an hmabak a la tam a. Hlawhtling zel turin theihtawp chhuah turin a fuih.

Khuallian chuan, zirlai hlawhtlinna chang leh lawmpuina MZP-in a pekte chu fuihin, an thiamna leh finnate Mizoram tana hmang tur leh hlawhtlinna la chang ve rih lote pawh beidawng mai lo a bei nawn turin a fuih a. Vawi khat hlawhchhamna hi beidawn nan hmang lo turin zirlai kalkhawmte a fuih.


Education Minister chuan, "kan zirlai a thil tangkai vak lo nia kan hriatte pawh hian, kan thluak a lo sawizawi a. Thil zir belh zel turin leh, hmasawn turin min pui hle a ni" a ti a. Thiam thil (Skill) hi tunlaiah a pawimawh tawh em avangin, zirlai piah lamah themthiamna nei turin ngaihtuahna i seng ang u a ti bawk.

Vawiin-a HSSLC 2024 Top 3-a Mizo tling chawimawite hi mipa 5  leh Hmeichhia 3 an ni a. Zirlaite hi chawimawina thuziak, tangkafai cheng sang nga (5,000) theuh hlan an ni.

He hun hi MZP General Headquarters Vice President Pu C. Lalremruata'n a kaihruai a, Major Richard Vanlalnghaka, TYS in hunserh a hmang a, GIG Motors CEO John Lalpeka'n thu a sawi bawk.

Zirlai lawmpuina hlan te chu:-
Arts stream 1na -Linden Lalremruatpuia S/o C. Lalrindika (Oikos HSS)
Science stream 1na -Lalramdina Ralte S/o Lalthakima (St Paul's HSS)
Commerce stream 1na -David Lalhminghlua S/o Paul Zakhuma (St Paul's HSS)
Arts stream 2na -Vungnemkim D/o K. Ginsuanmang (Mt. Carmel School)
Science stream 2na -Lalremruata Ralte S/o Ramdinsanga Ralte (St Paul's HSS)
Commerce stream 2na -Amram Laihnei Hlychho S/o Joel Laihnei Hlychho (St Joseph HSS)
Arts stream 3na -Rody Lalrotluangi D/o Rochanhlua (Mt Carmel School)
Commerce stream 3na - Vansangkimi D/o Lalthawmliana (Oikos HSS)