Mizo Zirlai Pawl (MZP) General Headquarters, Aizawl Executive Committee meeting vawi 631 (2023-2025 term-ah vawi 9) na chu vawiin chhun dar 11 khan MZP Conference Hall-ah an thukhawm a. School zirlaibu chungchang, Document lem chungchang leh pawl chhung thil pawimawh hrang hrangte rel a ni. Meeting hi MZP President Pu H Lalthianghlima'n a kaihruai.

Meeting chuan, tun hma atanga zirlaiten harsatna an lo tawh fona, Zirlaibu sem chungchang ngun takin a ngaihtuah a, a hun taka zirlaiten an zirlaibu an dawn theih nan a tul anga hmalak a, enzui nise tih a ni. 

Meeting chuan, Mizoram Sawrkar hnuaia Dentist (Ha doctor) hnathawk zingah document lem hmanga hna hmu an awm ngeiin a hria a. He thil hi enzui a, chhui chiang turin leh a tul anga hmala turin MZP chuan Health Minister a ngen nghal a. Sawrkar hmalakna hi ni 21 June, 2024 (Zirtawpni) thleng a ngaichang dawn a ni. 

Meeting chuan, Mizoram University (MZU) hnuaia Group B leh C post hrang hrang hna lak tura written exam pek vek tawh, thla kua (9) ral hnuah pawh result la tihchhuah loh avanga thalai hna zawng mekte manganna chu a ngaihtuah a. MZU hotute biak pawha, enzui sak zel nise a ti bawk a ni. 
 
Meeting chuan Zofate hnam inkawmpui lian "Zofest 2024" vawi-10 na thleng turin West Phaileng a ruat nghal bawk. 

(PR No. E-93/MZP-GHQ/2023-2025/62. Dated: Aizawl, the 3rd June, 2024)