Mizo Zirlai Pawl (MZP) General Headquarters buatsaih, GIG Motors- MZP Hnam lam intihsiakna hun chu vawiin ni 6 June, 2024 (Ningani) tlai dar 3 khan intihsiak kharna leh result puanna hun Dawrpui Multipurpose Hall-ah neih a ni a. He hun hi Pu C. Lalsawivunga, Art & Culture Minister-in Khuallian niin a hmanpui a, Pu C. Lalremruata MZP Vice President-in he hun hi a kaihhruai.

He hunah hian Pu H. Lalthianghlima, President chuan thu sawiin, "Mizote hi hnam tlem kan ni a, kan hnam nun zia thate kan humhalh a, kan hnam lamte kan chhawmnun hi kan mawhphurhna a ni a. Kan hnam humhalh nan kan lam mawi tak takte chawisan MZP-in a duh avangin hetiang hun hi a buatsaih a ni" a ti.


MZP President chuan, "Mizo hmeichhia ten hnam dang neih an in tihhmuh emaw tih mai turin, hnam dang an nei sup sup a. Chung ho chu an rawn in pholang nasa em em bawk a. Kan hnam a boral loh nan, Mizo ngei nupui pasalah nei ila. Kan hnam i humhalh ang u" a ti bawk.

Khuallian Pu C. Lalsawivunga chuan, "Ram changkang leh ropui apiangin an hnam zia leh nun dan an ngaisang a. An hnam lam leh ziate an humhalh a, an chawisâng thin a ni" a ti a. "MZP-in hetiang hun an buatsaih hi lawmawm ka ti hle a, rah ?ha a chhuah ka ring a ni" a ti bawk.

Khuallian chuan, Zirlai lam thiam tak takte chu, kan hnam zia leh lamte humhalh chungin an zirlai thlahthlam lo turin a fuih a. Ruihhlo leh eirukna lak atanga fihlim zel turin a fuih bawk.

GIG Motors- Hnam lam intihsiakna hi Dawrpui Multipurpose Hall-ah, ni 5-6 June, 2024 chhung khan neih niin, Cheraw (Buhza-aih) leh Solakia/ Sawlakia hmangin intihsiakna hi neih a ni a. Cultural club 12 an tel a. Lawmman an lak dan chu hetiang hi a ni:-
1na -Kawllen Cultural Club
2na- Mizo Cultural Club, Vaivakawn
3na- Huiva Cultural Club, Govt. Aizawl College.

Lawmman hi, 1 na hian pawisa fai cheng Sing sarih(70,000), Trophy leh Thuziak an dawng a, lawmman 2-na hian cheng sing nga (50,000), Trophy leh Thuziak an dawng a, Lawmman 3-na hian cheng sing thum (30000), Trophy leh Thuziak an dawng bawk. Cultural Club tel zawng zawngte hian participation prize cheng sangthum (3000) theuh an dawng.

He hunah hian Dr. Lalmalsawma Nghaka, CEO D3 Business Enterprise chuan thu an sawi bawk.