MZP chuan Mizoram chhunga Dentist (Ha Doctor) hnathawk zingah document lem hmanga hna hmu awma a hriat avângin, hmala turin Health Minister Pi Lalrinpuii chu a lo ngen tawh a. MZP ngenna anga Dentist-in banna a thehluh avangin MZP chuan lawmawm a ti hle a ni. 


MZP chuan Mizoram chhunga National Health Mission (NHM) hnuaia Dentist Surgeon (Ha doctor) hnathawk mek zingah document lem hmanga hna hmu an awm ngeiin a hria a. RTI Act hmanga MZP-in a chhui zui hnuah, NHM hnuaia thawk tur 2023 February thlaa lak zingah a tel a. Doctor a zir chhuahna nia tarlan Institution-ah hian a lut lo hrim hrim tih finfiah a ni bawk. 

Chuvangin, MZP chuan Health Minister chu ni 21 June 2024 ral hma ngeia, MZP thu hriat a dik leh dik loh chhui chiang tur leh a tul anga hmala turin a ngen a. Lehkha bakah hmaichhanah pawh Minister sawipui a ni. 

MZP ngenna chu Health Minister chuan chak taka a bawhzui avangin, Dentist Surgeon chuan ni 5 June, 2024 (Nilaini) khan a mah chhawrtu National Health Mission (NHM)-ah banna lehkha a thehlut tih hriat a ni a. NHM chuan ni 6 June, 2024 khan banna lehkha hi a pawm nghal a ni. 

MZP ngenna ngaipawimawh a, chak taka Health Minister-in hma a lak avangin MZP chuan lâwmthu a sawi nghal a. Health Department bakah, Department dang dangah pawh hetiang thil; Document lem leh dik lo taka hna hmu an awm leh awm loh a enzui zel dawn a ni. 

(No. E-93/MZP-GHQ/2023-2025/66 | Dated: Aizawl, the 7th June, 2024)