Nimin ni 28 June, 2024 (Zirtawpni) chawhma dar 11:30 khan Remna Ni vawi 38-na champhaphak lawmna Mizo Zirlai Pawl General Headquarters Aizawl chuan LPS Arena, Falkland Aizawlah buatsaih a ni a, inkhawm hi Pu C. Lalremruata Vice President in kaihruaiin, Rev. R. Lalrinsanga, Secretary, MKHC chuan hunserh a hmang a. Chief Minister Pu Lalduhoma chu khuallian niin hun a hmanpui.

MZP President Pu H. Lalthianghlima chuan thu sawiin, pawl zawng zawng leh mi zawng huap Remna Ni lawmna an buatsaih thin tih sawiin, sawrkar pawhin MZP huaihawt hi rem min tihsak a. Tu ta bik mah nilovin kan zavaia tan a ni tih pawmin, i tel tlang dial dial ang u, tiin mipuite a sawm.

Chief Minister Pu Lalduhoma chuan thu sawiin, “remna a awm theih nana theihtawp chhuahtu All Party Leaders te, Student Joint Action Committee te, Kohhran hruaitute, hun harsa tak kara Law & Order kengkawh hram hram tu Pu Lalkhama, IAS, Chief Secretary te an fakawm em em a. Vawiina MZP ten an chawimawi kum 1981 a MLA atanga bang ta te hi, remna a awm theih nana MLA bang hmasaber te an ni a. An phu tawk chawimawina an dawng lo fo ni tein ka hre thin, chawimawi an phu hle a ni. Zirlai pawl, vawiina Remna Ni ropui taka lawmtute hian remna kha in au chhuah, in thawhchhuah a ni tih lo hre reng ang che u,” tiin remna a awm theih nana thil thleng pawimawh zualte a tarlang a. Remna a awm theih nana khatihlaia India Prime Minister Pi Indira Gandhi ngenna leh MNF President Pu Laldenga pawmpui ngeia IPS hna a bansan tak thu te pawh a tarlang. "IPS ka bansan hnu lawkah Pu Laldenga hmuin London ka zin a, ni 5 lai ka cham a, India sawrkara a thilphutte kan endun thin a, kan sawiin kan duang bawk a. Chuvang chuan "kan" tih tawngkam te pawh ka hmang ve mai thin", a ti. Chief Minister chuan, "rambuai laia hnam sipai, nunna chan te kha ram tan an thi lem lem lova, Mizoram an hmangaih avangin an martyr tak tak a, zah leh chawimawi an phu em em a ni", a ti bawk.

Tun hnaia India ram chhung leh ram thenawma zofate awmna apianga buaina leh harsatna rawn thleng chu Zofate inpumkhatna tura Pathian remruat, nakin lawka malsawmna Zofaten kan dawnna tur a nih a rin thu a sawi a. Chuvang chuan "inpumkhat ang u, thinlunga pakhatah insiam ang u", tiin zofa zawng zawngte a sawm a ni. Amah dawr thintu thenawm state leh ram tea zofate pawh, pawl hran hranin thu hran rawn keng lova; pumkhat ni chunga thu khat rawn keng thin turin a chah a ni.

Pu Lalduhoma chuan, "MZP hian Politician eiru lo berah min lo thlang tawh a, Remna Niah chawimawina min lo hlan tawh bawk a, ka lawm em em a ni. Ramriah buaina a lo thlenga, MZP in lo lang thin, thenawm ramah zofaten harsatna an tawk a, indonate, tuilian te an tuar a, MZP in lo lang vat thin, MZP hi kan hnam tan a hlu em em a ni. Politics tuinu laka him chungin remna chawi nung zelin, ram leh hnam tan lo bei zel ang che u,” tiin zirlaite hi a chah a ni.

Kuminah hian Pu JH Rothuama, Pu P. Lalupa, Pu Lalthanzauva leh Pu Ngurchhina te hnenah chawimawina hi an hlan a ni. Anni pali te hian Remna a awm theih nan kum 1981 khan MLA an nihna an bansan a ni. Pu JH Rothuama leh Pu P. Lalupa te hi an la dam a, anmahni ngei lokalin chawimawina hi an dawng a. Pu Lalthanzauva leh Pu Ngurchhina te erawhin mual an lo liam tawh avangin an aiawhin an tu leh faten an dawng thung.

Remna Ni lawmna hi Minister Pu C. Lalsawivunga, Pu Lalthansanga, Pi Lalrinpuii, Dr. Vanlalthlana, Prof. Lalnilawma, Pu B. Lalchhanzova bakah Pu Lalmuanpuia Punte, Pu H. Ginzalal leh Pu TBC Lalvenchhunga, Adviser to CM te leh MLA dangten an telpui a, NGOCC Chairman Pu C. Lalhmachhuana’n thu a sawi bawk a. Zirlai naupang thahnem tak leh sawmbik mi engemawzat an kal.


No. E-93/MZP-GHQ/2023-2025/69                                                 Dated: Aizawl, the 29th June, 2024