MZP Genereal Headquarters, Aizawl chuan ni 9th July, 2024 (Thawhlehni) zan dar 8:00 khan Ignite Studio, Khatla-ah Mizoram University in a ni 24th June, 2024 (Thawhtanni) a Under Graduate result tih chhuaha Arts, Science, Commerce leh Home science stream Gold Medalist lawmpuina hun a buatsaih a. He hunah hian Pu PC Vanlalruata, Minister Agriculture Department changtu chu Khuallian niin, Pu Zairemthanga, Treasurer khaihhruaina in he hun hi hman a ni.

He hunah hian Pu C Lalremruata, Vice President chuan thusawiin, “ Mizoram a Central sawrkar department hrang hrang awm te, hnamdang Head of Department-a awm ten Ram leilung fa Mizote tham lo tak leh hmusit taka chetna tam tak awm leh hnalakah pawh hnamdang duhsak zawk leh dan diklo taka hna a thun tum an awm chu MZP chuan rem a ti dawn lo a, a enzui zel dawn a ni” a ti.

Sawrkarin Right to Education hnuaia school naupang lehkhbu a sem thin chu tunah hian zirlai tam takin la dawng lo in, school 700 chuang lehkhabu la dawng kim lo awm chu thuneitute’n a rang lama hma la turin MZP chuan a ngen a. Mizoram Government press,  Printing Press and Stationery Dept. hnuaia zirlaibu la print kim lo chu MZP chuan in enfiah turin a duh bawk.

Khuallian Pu PC Vanlalruata Minister chuan zirlaite fuihna thusawiin,” Central Service a Mizote dinhmun thlirin a lungawi thlak loh hle a, kan hnam tan pawh a lungngaihthlak zia leh zirna kan ngaihsan viau rualin a top level-ah duhthu kan sam lo hle” a ti.

Pu PC Vanlalruata chuan, Nationalism-ah kan chian a tul hle a, state danga kan tribal pui te Central Service-ah kan tluk lo hle a thangthar zawk te kan tan a ngai takzet. Social Media-in thangtharte a luah hneh hle a, kan tlansan ngam a hei ai nasa zawk a zirna lam  kan luhchilh a ngai takzet a ti bawk.

He hunah hian Pu Lalmuanpuia Punte,  Adviser to CM (Political) pawhin zirlaite fuihna thu tha tak tak a sawi bawk. 


Under Graduate Arts, Science, Commerce leh Home Science Stream Gold Medalist te hi Memento, MZP Sash, Pangpar leh pawisa fai cheng 5000/- hlan an ni a, heng mite hi lawmpuina hlan te an ni:-

Arts Stream - Lalhlimpuii, Economics Dept. (Pachhunga University College)

Science Stream - Lalhriatzuala, Chemistry Dept. (Pachhunga University College)

Commerce Stream - David R. Lalhumhima, (Pachhunga University College)

Home Science Stream - Gracy Lalruatthari, (Govt. Zirtiri Residential Science College)