Ni 26 October, 2024 (Inrinni) zing dar 6:30 khan MZP General Headquarters buatsaihin, Zirlaite Ni leh MZP Dinchamphaphak vawi 89-na pualin Aizawl khawpui chhungah "Ruihhlo Do kawngzawh" neih a ni. He kawngzawh hi Dr. Vanlalthlana School Education Minister leh Pu Lalnghinglova Hmar Excise & Narcotics Minister ten an telpui a. Aizawl khawpui chhunga sikul 23 atangin zirlai 1600 chuang an tel. 

Kumin Zirlaite Ni October ni 27 hi Pathianni a nih avangin, MZP chuan ni 26 Inrinniah an hmang a. Thupui atan "Ruihhlo- Zirlaite Hmelma" tih an hmang. 

Ruihhlo Do kawngzawh kharna hun, Vanapa Hall kawta hun tawi hmannaah MZP President Pu H. Lalthianghlima, Dr. Vanlalthlana Minister leh Pu Lalnghinglova Hmar Minister ten thu an sawi a. Zirlaite'n Ruihhlo ti lo tura intiamkamna hun an hmang bawk. 

MZP Dinchamphaphak hi kum 2007 khan, Mizoram sawrkar-in Zirlaite Ni atan a puang a. He ni hi Zirlaibu piah lamah zirlaite tana tangkai tur inzirtirna ni leh hun atan hman thin a ni. 

MZP hi kum 1935 October ni 27 khan Shillonga-ah din a ni a. President hmasa ber chu R. Buchhawna a ni. Tunah hian MZP General Headquarters hnuaiah Headquarters 13, Sub Headquarters 51, Branch 121 Mizoram chhung leh pawnah a awm mek a. Hnam Bil zirlai pawl 7-in MZP an zawm bakah Institution 25 te nen a thawkho mek a ni.