Vawiin ni 30 January, 2025 (Ningani) chawhnu dar 2:00 khan Mizo Zirlai Pawl General Headquarters hruaitute chuan, National Highways Infrastructure Development Corporation Limited (NHIDCL), Regional Office, Aizawl Executive Director Virendra Kumar Jakhar chu a pisa-ah an hmu a, Mizoram chhunga an hnathawh hrang hrangte an sawipui.

He hunah hian MZP hruaitute chuan, MZP rorelna sang ber Assembly vawi 68-na in a a lo rel tawh, "Mizoram chhunga inkal pawhna kawngpui sialtu, NHIDCL ten ṭha zawka hna an thawh theih nan MZP in hma la rawh se" tia an rel tawh bawhzuina a ni tih sawiin, hmun hrang hranga NHIDCL hnuaia kawngpui siam mek te chu ṭha taka thawk tur leh an hnathawhte a ṭul anga an enzui zel tur an hrilh a ni.
NHIDCL Executive Director chuan, tuna Vairengte atanga Sairang kawng siam mek pawh ngawrh lehzualin an buaipui mek tih sawiin, Forest Clearance an hmuh veleh chak taka an thawh zui nghal tur thu a sawi a. Aizawl By-pass road Sairang atanga Aibawk pawhna tur pawh thla thar hian hna an ṭan mai tur thu leh kum 3 chhunga zo tur an nih thu MZP hruaitute a lo hrilh a ni.