Vawiin ni 29 January, 2025 (Nilaini) chawhma dar 11:30 khan MZP chuan, Vety College (College of Veterinary Science & AH) Selesih a tlawh a. Krishi Vigyan Kendra (KVK) Selesih, Aizawla thawk tur Subject Matter Specialist (SMS) Fruit Science Post 1 lak danah thil fel tawk lo awm nia lang an zawtfiah.   

He mi chungchang hi MZP chuan Pi Lalnuntluangi Hmar, Dean, College of Veterinary Science & Animal Husbandry chu a Office-ah an hmu a. Vety. College hi Mizoram a awm a nih avangin, Mizo zirlaite tan a hlut hle thu an hrilh a. Chuvangin, a thawktu tur lakah pawh fair taka lak nise an duh tih an hrilh a. Mizo ngei tling leh tlak an awm chuan a tam thei ang ber lut se an duh tih an hrilh bawk. 

MZP chuan KVK hnuaia Subject Matter Specialist (SMS) Fruit Science post khat (1) hi, State dang atana lak ni si, Mizoram-ah dah a a nih daih chhan an zawt a. Mizoram a thawk tur chu, Mizoram tan advertisement a hranin chhuak mai se an duh tih an hrilh a. Chu chuan, Mizo thalai leh hna zawng mek, hetiang lama tling leh tlakte tan kawng a hawn ngei a ring a ni. 

Dean pawhin, institution hotute hnenah MZP duh dan a lo thlen ngei tur thu a lo hrilh a. MZP chuan ngun takin he a thu thlen chungchang hi a enzui zel dawn a ni.