Vawiin ni 28 January, 2025 (Thawhlehni) chawhma dar 10:30 khan MZP leh Thangram Indigenous Peoples' Movement (TIPM) hruaitu chuan, Mizoram Chief Minister Pu Lalduhoma chu a Office-ah an hmu a. Thangram dinhmun hrang hrang an sawipui.

MZP leh Thangram hruaitute chuan, Assam awp chhung Thangram area Sq. Mile 180 a zau hi, Mizoram-ah rin luh a nih theih nan hmalakpui turin Mizoram Chief Minister hi an ngen a. Assam awpna hnuaia awm Zofate tan chuan, Mizoram chhunga awm hi an hnam leh sakhua tan pawh a him berin an hria tih an hrilh.
Assam awp chhung, Thangram (Singla Valley leh Langkaih Valley) hi Zofate chenna a nih avangin, hnam lian zawk ten an nek reng a. Forest Reserve Area a Assam Sawrkar-in a ngaih avangin, Thangram chhunga Zofate chuan in leh lo dinna kawngah harsatna nasa tak an tawk thin a. Kawng tam takah harsatna an tawk tih an sawi. Chuvangin, an mahni unaute awmna Mizoram chhungah Thangram hi rin luh an duh a. Theih ang anga hmalakpui turin Mizoram Chief Minister hi an ngen a ni.
Chief Minister pawhin, Thangram mipuite a hriat reng thu sawiin. An hmalaknaah tangkai theihna a neih chuan tlanchhiat a tum loh thu a hrilh
Thangram Indigenous Peoples' Movement (TIPM) te chuan kum 2020 atangin, Assam awp chhung Zofate chenna Thangram area Sq. Miles 180 hi, hnam lian zawkte laka a him zawk nan leh an hnam puite nen rorelna pakhat hnuaia an awm theih nan, Mizoram State hnuaia rih luh phutin hma an la a. Theih ang ang hmala in, India Prime Minister hnenah pawh Memorandum an lo thehlut tawh a. Assam sawrkar pawh vawi tam tak an lo sawipui tawh a ni.
MZP nen kawng hrang hranga thawkhoin, Thangram mipuite hmasawn nan leh Zofate inpumkhat nan hmalakho zel an tum a ni.
He hunah hian Pu Lalmuanpuia Punte MLA, Adviser to Chief Minister (Political) pawh a tel a ni.