Mizo Zirlai Pawl (MZP) General Headquarters, Aizawl buatsaihin March 5, 2025 chawhma dar 11 khan Dawrpui Multipurpose-ah kum 1966 March ni 5-a Mizoram Bomb hmanga beih champhaphak, 'Zoram Ni' hman a ni a, He hun hi Pu K. Vanlalvena, MP (Rajya Sabha) chuan khuallian niin a hmanpui.

Kumin Zoram Ni thupui atan "Tho la ding ta che" tih hman a ni a, thupui hi Pu Vanneihtluanga Editor, Lengzem chuan thiam takin a sawi. 

MZP President Pu H. Lalthianghlima chuan thu sawiin, "Zoram Ni atang hian hnam hmangaihna nei thar ila. Kan hnam tawrhna atangin hmalam i pan ang u" a ti a. Kum 1966 khan Mizo ten zalenna famkim nei turin hma kan la a, India kan nih loh hlauin Jet Fighter meuh hmangin min bei a. Kan ram kan intodelh hmaa min enkawl hi Central India mawhphurhna a ni. Mizoram ram ralmuang kan ni chunga; Enforcement Directorate (ED) leh National Investigation Agency (NIA) te kan ramah an rawn sapatal thil hi pawi kan ti hle a. Mizoram-ah duh duha an rawn tal zel a nih chuan, MZP in nasa takin kan la dodal hun a awm ang a ti a. Fimkhur turin ka chah duh a ni a ti bawk. 

Khuallian Pu K. Vanlalvena MP chuan, India Independence Movement-ah Mizote kan tel loh avangin India Danpui-ah Mizote himna tur a awm lova. Chuvangin, Mizo Independence Movement a lo piang a. Mizo ten kum 1966 a zalenna a puan hi Jet Fighter meuh hmanga hmeh hmih tum a ni hian, he movement nep loh zia a ti lang a ni a ti bawk. 

Mizoram MP chuan, Mizo Independence Movement hi hlawhtling chiah lo mahse, Mizote himna tur hi chiang takin India Danpui-ah tarlan a ni ta a. Kan ram leh kan sakhua humhim hi kan mawhphurhna a ni. Tun hnaiah kan unau; Manipur, Burma leh Bangladesh atanga rawn raltlante ngaih theih lohna leh hmuhsitna sawi a tam hle a. Hetiang mite hi a tlangpuiin Vai Nationalism-in a chhumhminte an ni tlangpui a. Tunah keini him angin lang mah ila, engtik niah emaw chuan kan unau, tuna kan mikhualte hi kan la belh hun a la thleng lo ang tih a sawi theih loh. Chuvangin, chapo thei kan ni lo a ti bawk. 

He hun hi MZP Vice President Pu C. Lalremruata'n a kaihruai a, Pu H Hrangkunga NESO Coordinator-in hunserh hmangin, MZP General Secretary Pu Chinkhanmanga Thomte chuan Zoram Ni hman chhoh dan report a pe a. Kum 2008 atangin MZP-in Zoram Ni hi a hmang tan a ni. 

He hunah hian MZP chhungkua bakah, College hrang hrang zirlaite leh NGO hrang hrang aiawhte an tel a. Zoram Ni puala Article inziah siak leh Reels insiamsiak a lawmman semna hun hman a ni.