19 March, 2025::: Vawiin chhun dar 12 khan MZP General Headquarters Elected OB leh Adviser Meeting neih a ni a. Tun hnaia Manipur Zofate inkara buaina chungchang ngaihtuah a ni. 

MZP OB leh Adviser Meeting chuan, Manipur Zofaten hmelma thuhmun an neih lai leh, rorelna hrang (Separate Administration) nei tura hma an lak mek laiin, Hmar leh Zomi inkarah buaina nasa tak a chhuak hi pawi a tiin, vanduaithlâk a ti hle a. Dawhkan pakhat kila inremna thu sawi vat turin Zomi leh Hmar hruaitute a ngen a ni.

MZP chuan, Zofa leh Zofa inkara buaina leh thisen inchhuahna hi engtik lai mahin ṭha a ti ngai lova. Pawm zam harsa a ti hle a ni. Hetiang buaina hian eng thil ṭha mah a thlen loh avangin, in phah hniama, remna thu sawiho vat turin a ngen tak meuh meuh a ni.

Hun lo kal zel turah pawh Zofate chu chengho kan nih avangin, tute pawh thu inbah sual theih a ni a. Hetiang a awm pawhin a hnam anga buaina kalpui leh tipunlun zawng ni lovin, chin fel vat vat dan ngaihtuah turin Zofa hnam hrang hrang hruaitute a ngen a ni.

MZP chuan Zofate inpumkhat a, lungrual taka kan awm theih nan theihtâwp chhuahin hma ala thin a. Zofate inpumkhatna tichhe zawnga hmala lo turin Zofate zawng zawng a ngenin a sawm tak meuh a ni. 

Issued by: Mizo Zirlai Pawl, General Headquarters Aizawl