Nimin ni 15 March, 2025 (Inrinni) tlai khan MZP General Headquarters hruaitute chuan Union Home Minister Pu Amit Shah chu Raj Bhavan-ah an hmu a. Zirlaite tana hmasawnna tur thil hrang hrang an sawipui. MZP hruaitute hi Pu C. Lalremruata Vice President-in a ho a ni. 

MZP chuan, Union Home Minister hnenah hian; Thingtlang a bik takin Border Area-ah Sikul building tihchangtlun a ngaih nasat thu leh, Zirlaiten harsatna an tawh thin hrang hrangte an thlen a. Union Minister chuan, MZP thil thlen chu thil pawimawh tak a nih avangin, State Sawrkar nen tang dunin hma an lak tur thu a lo hrilh a. Sum ngai turte chu Center sawrkar atangin theihtâwp chhuaha ngaihtuah pui a tum thu a lo hrilh a ni. 

MZP chuan Mizo thalaite Centre Service leh All India Service ah an lut tlem ta lutuk chu hmalak pui turin, Union Home Minister hi an ngen a. A bik taka Mizo zirlaite tan ruahmanna siam tur leh, Coaching Facility ngaihtuah sak turin an ngen a. Union Home Minister chuan, MZP thil thlen chu lo enzui a tum thu sawiin, Coaching Center changtlung tak Mizoram-in a neih theih nan ruahmanna siam a tum thu a sawi. 

MZP chuan, Union Home Minister Pu Amit Shah hnenah hian Mizo Zirlaite, a bik takin thingtlâng leh hmun hla zawk a awm zirlai harsate tan "National Integration Tour" buatsaih sak turin an ngen a. Minister chuan Border Security Force (BSF) te kaltlangin thil tih theih mai a nih thu a sawi a. Hma a lo lak tur thu hi a lo hrilh a ni. 

MZP chuan, Zirna kaihhnawih hrang hrang bakah India leh Myanmar inkar hung tumna leh Free Movement Regime (FMR) thiah a ni hi Zofate inpumkhat nan tha a tih loh thu ziakin a thlen nghal a ni.