Ni 18 March, 2025 (Thawhlehni) chawhma dar 11 khan MZP General Headquarters Executive Committee Meeting vawi 640 (2023-2025 term-ah vawi 18) na chu MZP Conference Hall-ah neih a ni a. Zirtirtu aikal la chungchang, Assam Rifles ram chhuahsan chungchang leh Remna Ni chungchangte rel a ni. Meeting hi Pu H. Lalthianghlima President in a kaihruai. 

1. Meeting chuan, Mizoram sawrkar hnuaia zirtirtu aikal la an la awm leh awm loh chhui chiana hmalak nise tiin a rel a. Tlang hrang hranga MZP hruaituten, an mahni huamchhungah chutiang an awm leh awm loh chhuichiang se. March thla ral hmain MZP General Headquarters-ah thehluh nise an ti a. Aikal lak tih tawp a nih theih nan theihtâwp a hmalak nise an ti.

2. Meeting chuan, Mizo mipuiten kan nghakhlelh em em, Aizawl khawpui laili atanga Assam Rifles-te an in sawn chhuak ta chu lawmawm a ti hle a. Assam Rifles-te insawn chhuah a nih theih nana tha thawhtu, sawrkar mek leh sawrkar kal tawh zawng zawngte leh India Sawrkar laipui chungah lawmthu a sawiin, a chhuang takzet a ni. MZP chuan, Assam Rifles ram chhuahsan chhunga mimal ram (LSC) la nei zawng zawngte a rang thei ang bera pe let (surrender) turin a ngen a. Mipuite tana hmun tangkai leh thawl a nih theih nan, pawl leh kohhran tute pawhin hmuhhma neih tum lo turin a ngen a ni. 

3. Meeting chuan, kum 2025 Remna Ni chu hman leh ngei nise tiin a rel a. Ropui thei ang bera Remna Ni lawm a nih theih nan Organising Committee a din nghal.